Брашура «Мова варожасці на бегемотах»

Павестванне ў брашуры пачынаецца з надпісу «Бегемоты — не жывёлы, а нязверы!», ад якога «кроў у жылах бегемота закіпела ад крыўды і абурэння».

Далей сюжэт брашуры-комікса распавядае пра перыпетыі варожасці паміж бегемотамі і гіпапотамамі, што паводле ўсіх законаў драматургіі нарастае і выліваецца ў лютае супрацьстаянне. Аўтары праводзяць аналогію паміж млекакормячымі з атрада парыкапытных, якія распачалі варажнечу, і адносінамі паміж людзьмі, што дыскрымінуюць іншых праз нязначныя адрозненні.

Аўтары казкі — Віялетта Ермакова і Алег Ражкоў, журналісты і міжнародныя эксперты ў галіне мовы варожасці, заклікаюць супрацьстаяць ёй без юрыдычных забаронаў.

«Мова варожасці на бегемотах» адказвае на пытанні: «Ці можна проста забараніць мову варожасці?», «Чаму я мушу рэагаваць на мову варожасці?», «Што я магу зрабіць?».

Алег Ражкоў, кіраўнік праваабарончай ініцыятывы «Журналісты за талерантнасць», падкрэслівае: «Мова варожасці — гэта складанае і комплекснае паняцце, да якога па-рознаму падыходзяць сацыёлагі, праваабаронцы і юрысты. Сёння існуе мноства азначэнняў, што ж гэта такое, і ніводнае з іх не з’яўляецца ўніверсальным. У брашуры мы на яскравых прыкладах паспрабавалі аб’яднаць некалькі падыходаў, каб кожны мог скласці сваё меркаванне, што такое «мова варожасці» і чаму яна небяспечная для грамадства».

Брашура будзе карыснай журналістам і блогерам пры падрыхтоўцы тэкстаў. Актывісты змогуць даведацца, як рэагаваць на вербальную агрэсію і спыняць яе. Юрыстаў зацікавіць пытанне, дзе праходзіць мяжа, пасля якой павінна дзейнічаць абмежаванне свабоды слова.

Версія для спампоўкі даступная на рускай мове.